PATRA PUSAKA JAGAT NATA

PATRA PUSAKA JAGAT NATA

Saban-saban robah mangsa ganti wanci ilang bulan kurunyung taun, sok mindeng kabandungan jelema, sanajan ngalamun salaput umur, kahayang patema-tema, karep heunteu reureuh-reureuh. dageuning nu bakal karasa mah anging kadar ti pangeran, manusa kadar rencana.

Jaman ayeuna, jaman sangara iprit unggah masjid. Barakasakan di kedok pandeta. Balik ka jaman majapahit. Buka hate lan pikirna ayeuna mangsana masing eling kalawan bukti, masing waspada kalawan laku nyata. Sing tarapti, caringcing sing pageuh kancing, saringset sing pageuh iket. Manuk di pucuk caringin kapanasan, jujukutan kabeulit akarna, buahna niggangan akar pasti. Tong kabobodo tenjo kasamaran tingali tong kawas jelma boloho di beulit oray-orayan, oray nyaan di gareubugan.

Sajadah ngampar di sawah, kopeah dipajang rupa warna, sing kade gobang konsrang. Ulah oge jiga jelema nu hayang disebut sohor ngayak beas, nu badag maloncor, nu lembut nyangsang. Kulantaran sabab caraka jadi bathanga.

Sing jadi jalma anu mulya, sifat mulya nyaeta sadar kana asal usulna, ku halna katungtik lahir bathina, kasasar ragana, kaguar sakujur awakna. Nagajadi apal ka dirina tug neupi ka apal kanu ngusik malikeuna. Neupi ka karampa aib dirina, anu akhirna bakal subur kabijakanana.

Mangsa sarangenge di jati gede meletek geura tingal ka wetan priangan kantun tulisan, ka kidul jati pakuan gararing, ka kaler Pajajaran pudar katutupan sari pati nu teu kaharti, ka turuban ku umbul-umbul simbul. Mana laku nu ngaku jeung umaku seweu siwi siliwing trah pajajaran, mana ciri trah Siliwangi. Mana ancikan para wali, mana tuturus laku ti Rosulullah. Salaku panyampurna kabuhunan.

Ayeuna jaman perang bratayudha. Kulantaran kitu hayu urang masing-masing pentangkeun senjata konta ngaraksukeun kre anta kusumah di mahkota aji wijaya, di geulang kembang cangkok wijaya kusumah. Ulah ringrang direncangan taji sang hyang. Tuh tinggali gunung Pajajaran ngalingkung tapakna kabagi opat. Papagon ciri turunan jati waringin. Tuh ombak laut kidul nu motah nu jadi bukti ciri kabuhunan nu ngandung midjil kasajatian.

Ngan omat anu ngaran satria ulah lanca linci luncat mulang udar tina tali gadang, omat ulah lali tina purwadaksina kajeun ngeduk cikur kedah mihatur nyokel jahe kedah micarek satria lamun cacarita nyaur kudu diukur nyabda kudu di unggang teuleuman papatah kolot “Manuk hiber ku jangjangna, Jalma hirup ku akalna”. Ulah nuduh kanu jauh, ulah nyawang kanu anggang, nu caket geura raketan, nu deukeut geura deheusan, moal jauh tina wujud moal anggang tina awak, aya naon jeung aya saha? cirina satangtung diri. pek geura panggihan diri sorangan, ngan ku maneh weh sorangan, ulah waka nyaksian batur saksian heula we diri sorangan.

Cekeul arah kahuripan ku ayana kadalina ajaran agama. Tuduhna firman gusti nu nyatana nu jadi picontoeun, corakna dakwah, raehanna sabda, cirina pepeling, kembangna pituah. Panungtuna usuluddin, panetegna tajridul qolbi, awamna ibadah. Khowasna ubudiyah, syareatna fiqih, hakekatna faqih, tumarimana sholat, lakuna sambehyang, kukuhna teuteupan.

Geus mangsana kuda beureum napak dina jalan cagak, rarangkena tujuh mahkota. Peucutna tujuh, Endongna tujuh. Kadalina opat, nu tumpakna lima, kandangna opat. Pamakannanna opat, parabna dua belas rupa. Mun kacangcang iring-iringan, mun ngencar abrut-abrutan. Dikendangan engklak-engklakan, di sawer sosoledatan. Geura kandangan bisik kaburu surup.

Cunduk kana wukuning taun, datang kana mangsaning wulan, nepi kana jangji pasini, pasang subaya, kuring urang pakampungan bau lisung lilimbungan, kuring ti padesaan patepian, anu kaoyagkeun ku geunjleungna jaman anu ngajak hanjat kana hambalan kaluhungan. Kaluhungan karuhun anu dikeben-keben dipangkring ku kapamalian, ayeuna mangsa ngabuka silib sindir sindang siloka ka gerewahkeun kasinaran sosorotna jaman.

Sesepuh ti pilemburan jawara ti patepian anu tara mantra-mantra ka nagara, ayeuna ting gandeuang nembongkeun tandangna, pagandang-gandang paginding-ginding dina kalangan pusaka. Komo deui ayeunamah anu ngondang ti pupuhuna pusaka, mani ting korejat, caruringhak paheula-heula nemonan pangangkirna pupuhuna anu salilana jadi buah kalbuna.

Kuring anu kasebat urang kampung bau lisung, kagugah jeung kasebet hate jorojoy aya maksud hayang datang kana pakalangan, tapi ngan saukur dina rasa kulantaran lieuk euweuh-ragap taya, teu aya kikintun nu sae, kawantos ti pagunungan.

Mung hatur lumayan manawi bahan katampi sugan sugema kana manah mangga nyanggakeun tutungkusan ti para sesepuh anu parantos teu aya dikieuna, mangsa nu jadi saksi gunung kunci mangsa diburakna gedong peteng, ku lantaran geus nincak kana ugana.

“Di mana "Hanjuang" geus sirungan, "Bitung geus iwungan", nya pelak Embah Sayang Hawu atawa anu katelah embah Jaya Prakosa anu aya di wewengkon Kuta Maya patilasan Dayeuh baheula. Mangsa masih ngadegna sumedang larang jadi nagara, mangsa urang sumedang corengcang, da baheula jalemana patambuar, indit sirib karuli ngadon buniaga di dayeuh anu katelah bandung ayeuna. Malah kungsi disusulan ku pupuhu lemburna ke kapala-kapala desana, ngan hanjakal anu nyusul malah teu marulang deui komo nu disusulna, leungit tanpa lebih ilang tanpa karana.”

 Patra Pusaka..!

Baheula…!!!, Pajajaran anggeus tilem keuna wajah mudu pindah ka sejen alam! Tapi ayeuna, patula patali jangjina amun anggeus ngadeg deui Raja anu makuta inyana tina buludru papak, jeung ngaran inyana wawayangan, Pajajaran teh, baris ngadeg sakali deui.

Patra Pusaka..!

Ayeuna mangsana, amun aya alam genjlong ngabelahna antara kidul jeung kalerna wetan jeung kulona, mangka tah eta pi tandana pisan Pajajaran ngahudang wayahna ngaran unggah panggung ngalalakon. Lalakona Matapoe, anu muncur nyampeur aweuhan, aweuhan jaman mulang deui, pikeun ngamusnahkeun kajayaan arinyana : 

Anu sarakah datang ti wetan, Anu nyarorok datang ti kaler, Anu baradegong datang ti kulon, Anu naripu datang ti kidul. Tapi masing dia nyaho: Ngadegna Pajajaran kakalangkangan heula raja panyelang.

Patra Pusaka.

Amun aya raja nitah nuwar eta Pakujajar sadapuran, tah eta pisan tandana : Raja bakal paeh dipaehan...! Tapi lain ku bangsa Pajajaran ... !

Amun aya raja nitah Pakujajar dijajarkeun jadi papajang taman tengah Dayeuh anu anyar, Tah eta pisan nya tandana : Anu harita ngadeg raja, Inya na teh bener titisan Salah sahiji raja Pajajaran... !

Tapi, nagara Pajajaran mah acan ngadeg. Sabab nagarana mudu jadi deui tegal peperangan.

Pamatri kaasih tinu asih pamageuh rasa ti pamanah rasa

Raweuy-raweuy ku tangkal kabungahan, cirina panceur reujeung akarna anu ngajadi dina purwadaksi. Daging kulit gelaran sukma tina ka awaman kana tingkat khowasna. Meulit ngajadi dina diri reujeung sanubari, ngaraweuy buahna ngamuara dina rasa. Daunna anu ngajadi papayung agung pangiuhan tina kapanasan jeung kahujanan. Buahna anu ngaraweuy jadi landong kanalangsaan jeung kasangsaraan.

Mangsana kudu silih asih, silih asah jeung silih asuh, Taraje nangeuh dulang pinande, Sing daek nulung kanu butuh, nalang kanu susah, ngahudangkeun kanu sare, ngajait kanu titeuleum, mere kanu daek, nyaangan kanu poekeun. Geus meujeuhna ngaji diri kulantaran moal aya nu apal tapak soang di awang-awang, lamun ngalangkang ngan teu di sorang. Moal aya anu apal tapak meri dina leuwi lamun teu disungsi.

Ciri hade ku silih simbeuh silih asah ku pangabisa, silih asih ku pangarti, silih asuh ku pangaweuruh. Lain harti endog mapatahan hayam payus, mun hayam nyileungleum dina padaringan, hayam nitah ngojay hade ka meri wajar mun meri ngojay dina pabinihan, maksudnamah silih elingan. Anu lain kudu dilainkeun anu enya kudu dienyakeun, cundu kana waktu kudu paheuyeuk- heuyeuk leungeun paantay-antay panangan. Ulah taluk pedah jauh tong hoream pedah anggang jauh kudu dijugjug anggang kudu diteang ka cai jadi saleuwi kadarat jadi salogak.