RAJAH RUWATAN GALUNGGUNG

RAJAH RUWATAN GALUNGGUNG

RAJAH PAMUKA JEUNG PAMUNGKAS

Sampurasun...

Amitan kanu gaduh pangacian anu ngaruncang
Seja ngaguar laratan sungkemeun kana lamunan

Sampurasun karumuhun ka seweu siwi Siliwangi

Anu murba di Padjajaran gelarna nyebar wawangi

Simbulna urang teuleuman ku geter sipatahunan
Simbolna urang tataran ku laratan jeung harepan

Ngembat laratan katampian pangauban pundung
Pangjiad jeung pangraksa ka hate kapigandrung

Padungdengan ngabuka tutungkusan nu kahalang

Kaliliwatan kupipinding na awi ngajadi karinding

Siloka gumelarna anu nyata atra setra kanti sukma

Natrat dina batu tulis titis tulis maca uga na waruga

Bismillah darma bubuka carita tinu nyata

Bi idznillah, Bi fadillah, Bi qudrotillah

Sapun ka pupunclak Agung Pamunjung

Gusti Allah anu maha Agung rumuhung

Siloka mangsa baheula urang guar dina carita

Sindang anu mangsa harita  urang buka ku basa

Darma ngalalana anu gumelar di alam marcapada

Balungbung napak lacak laratan nicak dina pada

Paralun handeuleum tunda anu karuhun

Hancaeun nyatur galur catur anu buhun

Carita anu dicaritakeun puguh dapur walurna

Carita nu teu direka reujeung puguh muharana

Lalakon lawas na carita ayeuna tinggal ngangresna

Nyukcruk galur cacandran diteang ngan ku ciptaan
Jangji pasini anu ngajadi Siliwangi rasmining wanci

Kamari nu leungit seungit nyambuang mashur pamit

Siloka mangsa harita lalakon sajagad raya kawentar

Leuweung sancang geus ngarangrangan mawa kabar

Wangsit di kubur pitutur nepungkeun asma anu luhur

Lalakon pegat disambung pinuh wawanen teu takabur

Seungit angin wiwitan wawangina sumebar na harepan

Mangsa kacapangan Galuh Pakuan pinuh panineungan

Lemah katresna jati sarakan nandakeun gumelar babar

Samagaha geus ngiberan ginanjar putra Pajajaran anyar

Sampurasun ing-sun ka sang rumuhung anu kasarung

Punclut pupunjung anu ngageugeuh Galuh galunggung

Hirab pinasti tepung jabung tumalapung kapigandrung

Manusa anu lain mupunjung kana sariak layung gunung

Cumarita dina wanda padalisan anu di reka carita pujangga

Manggihan uga jatnika mangsa baheula dina sagara ngagurita

Tohaan balarea sariksa gilang gumilang sarta lugina di nagara

Ragragna kecap pandita guru daksina mamala sinatria putra raja

Pun sampun kang sang rumuhun anu ngageugeuh galunggung

Merbayaksa ka pangersa anu aya di tataran desa murbawisesa

Galunggung anu jadi kabuyutan muka carita mangsa katunda

Cinarita dina pantun nu jadi carita uga guru sukma gelar batara

Batara semplak waja mangsa baheula purah ngaistrenan para raja

Raja pandita anu ngawasa dirasa ngeunaan kenana dora bancana

Ngajar sangkan urang teu tinemu lara mala na lunas papa naraka

Pangawasa jadi ciri utama bijilna ti baga lawan purusa sasakala

Sasakala cinarita mangsa anu baheula ka selang jaman ayeuna

Rumpakan baheula dina carita marudahna sagara katalangsara

Baga purusa jaman ayeuna lain teu boga utama mangsa baheula

Raga titinggal nyawa mangrupa siloka miraksa alam marcapada

Amit widi neda pangaksami kanu ngawasa sukma

Bubuka carita nu baheula jasad sukma rohing nyawa

Mangsa langit ngait jagat rapak narimakeun raga kaula

Muka kalimat dina raga metu dada cahya acining rasa

Ngumbara jeung ngabatara di buana tunggul pawenang

Manik mutiara Sir Cipta Mulia Cipta anu hurung herang

Bubuka dina siloka uga anu ngaran mata holang manusa
Ngamuara dina anu di sebut isun kurungan tunggal wisesa

Medal ti baba Adam anu ngajadi sareng babu Hawa

Herang lencana mustika larangan cahya ning jelema

Asyhadu syahadat bawa ngajadi jagat bathin manusa

Raga manusa waluya anu murba di tanah galuh sunda

Pun sapun ka sang rumuhun kanu maha agung
Paralun ka para karuhun anu aya di galunggung
Bihari mangka widi Ji sim ngaluber kana jangji
Ka bujangga nu harita muka waruga batara

Waktuna nyaangan bisi aya gantar kakaitan
Mangsana nyinglar bisi aya tali ruruhitan
Nempuh jukut rucuk nyorang cugak
Pangnyinglarkeun, Pangmusnahkeun

Lastari anu di pamrih wanci pasini anu mustari

Disampurnakeun dina mangsa kiwari

Ngajirim jadi nu utami

Ligarna kembang jayagiri