RAJAH SUMEDANG

Nyukcruk galur ka pungkur kana catur juru pantun
Ngaguar muka carita ka kidung nu kasebut buhun
Nu di teundeun di handeuleum sieumkeun caritana
Anu di tunda dina hanjuang siangkeun cinaritana

Satria tandang pertentang babar jati diri pasundan
Kasaktian nu jadi iberan jeung kujang jadi ageman
Sasakala baheula jadi ragragna mangsa katangtuan
Dayeuh Galuh Pakuan nu katelah Pakuan Pajajaran

Nagri pajajaran nanjung nagri sunda panjang punjung
Sunda sieup nimbang pulung mangsa sunda adi luhung 
Bukti pantun ahung gunung sunda surup kana tangtung
Ajeg karajaan galuh agung saksina gunung galunggung

Nagara bukti wibawa lamun ka Jaga Tirtanana
Nagara kertaraharja lamun bisa ka jaga Wanana
Nagara bisa kabuka rasa lamun ka jaga Raksana
Nagara bukti waluya mangsa jaya jaga Kramana

Ingsun medal mangrupa putra mibanda kasumedangan
Gunung handeuleum galunggung nu jadi saksi keresian
Sriman Sriwacana saksina Talaga alam kasumedangan
Cipta raga sirr cipta rasa bubuka siloka elmu katunggalan