MANTRA SAJAK SUNDA

KATA PANGJAJAP

NU RINGRANG DI ALAM KALANGGENGAN

Assalamualaikum Wr. Wb.

Pun Sampurasun….!!!

Ti saprak dipenta nulis runtayan kalimat pangjajap ku anu nulis ieu buku, kuring ngarenghap narik napas panjang. Ek teu kitu kumaha, sareretan waktu sakaca, dua kaca, tilu kaca dibaca eusi ieu buku, bet kalah muriding muringkak bulu punduk. Asa keur maca wangsit atawa karuhun nu keur cumarita sanajan lolobana mah teu ieuh kaharti naon maksudna.

Kusabab keukeuh pangarangna menta sangkan kuring nyieun runtayan kalimah pangjajap, kapaksa kuring menta pangarang ngajelaskan maksud saban bait tina sajak anu aya dina ieu buku. Rey, rey, awak kalah ngararey,

kulit ngadadak jaradi jiga nu barentus dibarengan ku bulu punduk pating puringkak.

Untungna kituna teh ukur sakedapan. Bener sangkaan kuring, nyatana aya bau harewos bojong, nu nyambuang kana sabudeureun awak. Teu lila, aya nu sumeleket dina hate, teterejelan hayang kedal. Kumaha lamun ieu buku nepi ka leungeun anu maca, naha ek nimbulkeun rasa anu sarua?

Ditanya kitu, pangarangna mah anteng bae malah bari surungah serengeh. Pokna, keun bae da lamun geus mimiti dibaca bakal asa ngawakong jeung diri sorangan. Naon maksud, buku sajak ieu mangrupakeun itung-itung harewos ti alam kalanggengan kanu keur ngaheuyeuk dayeuh ngolah urusan alam marcapada.

Mimpit amit ngala menta, ngolah rumasa

Ngaji diri ti mangsa kiwari muput nu sajati

Maca rasa kana rasa, maca raga kana raga

Nganjang kana raga nu henteu kumawasa

Neda ampun nyaparalun, Sampurasun karumuhung

Lalampahan muru ngalarung angkara nu ngaberung

Ngusik-ngusik macan turuna, ngusik ula mandina

Bubuara seba di marcapada, Hirup pasti aya galurna

(Nyaliksik Diri h…)

Saperti, ceuk dina salah sahiji katerangan dina syareat Islam netelakeun yen loba jalma soleh anu maotna disebut syahid teh nyatana mah teu maot. Malah ku Alloh Pangeran nu murbeng alam disebutkeun yang aranjeuna masih jumeneng tur masih dipaparin rejeki persis saperti kalolobaan jalmi anu masih gumelar di alam marcapada. Ku kituna, pasti teu aneh lamun para karuhun anu parantos ngantunkeun ti payun masih paduli jeung malah mere beja sakur totonden anu katampa ku panca indera.

Nyi Ronggeng manggung jadi cirina cimanuk arum

Jampang manggung ngaguar cikapundung-citarum

Sinjang kebat sasakala nu rumasa jadi kala baralak

Satria lunta tina tuna kabisa pancawala seja bumela

(Ruwatan Manglayang h…)

Ragragna uga dina mangsa harita lain harti muara bakal sulaya

Babasan ngandung siloka keur bacaeun balarea mangsa ayeuna

Dwikrama ngabahudenda dina carita gubragna uga katalangsara

Mungguhing marcapada tempatna siloka, mawa angkaramurka

(Sancang Na Manglayang h….)

Sindir nu jadi ciri ti kamari, Siloka nu jadi nyata ayeuna

Balabar sangka sinatria sukma anu ngarasa tunggara

Bubuara di alam marcapada jangkar baya kena lara

Mangsa Mundinglaya Dikusuma hamo ulah jadi karma

(Resi Manglayang h….)

Tri Tangtu di Buana mangrupa siloka nyata nu katara
Saptapuraga guritana trisula nyata raja salakanagara
Sastrajingga ungkara basa sinjang rasa ngabahudenda
Ragamulya napak mangsana ubah uga marcapada

(Sinatria Buana h….)

Bait-bait sajakna memang rada aneh dina hartos beda ti nu lian. Jeung deui, lamun ditengetan hiji-hiji malah mun diteuleuman make rasa, tinangtu sakumna nu maca bakal ngarasa yen asa para karuhun anu parantos ngantunkeun ti payun nu nyarita ngaliwatan sajak-sajak dina buku ieu jeung deui jiga anu ngabejaan malah mertelakeun totonden anu seuseurna mah sok dilalaworekeun ku manusa mangsa ayeuna. Ku sabab kitu, teu aya salahna atawa tinangtu ieu buku bakal loba mangfaatna keur nu maca, bari komo deui jeung make rasa.

Mangprang mancak medan danalaga masang raga bitotama

Tunggang jaran mapak mega bodas dina sadapan harepan

Satria kinayungan siger tengah ngawaruga wanoja pancerna

Natrat jelas hideung bodas kontrasna warna kahirupan dunya

(Srikandi Eyang Haji h…)

Ditatar reujeung dipulut ku asih juru puhawang
Balungbungan midua rahayu dina mumunggang

Simpen cing rikip, ditunda na hanjuang moal diteang

Simpen sing pageuh dina handeuleum moal diruncang

Waluya Jati ……. Rahayu.

(Wekasan h….)

Dina salah sahiji ajaran Filsafat anu ditetelakeun ku Ibn Arobi, aya anu disebuut elmu Hudhuri jeung Elmu Hushuli. Gampangna, Elmu Hudhuri bisa dihartikeun lain ukur migawe syareatna (Hushuli) tapi nu mere syareatna oge datang milu icikibung dina diri urang. Kusabab kitu, salian ti gampang kaharti, tapi oge bisa langsung dilaksanakeun jeung prak-prakana. Malah ku datangna/hadirna anu disebut hudhuri tea, pangaruhna nyata pisan ka diri urang.

Pangaruhna eta bisa katingali dina bag-bagan kahirupan. Jalma nu ukur nepi kana syareat, kahirupanna teu beda jeung jalma-jalma biasa laina. Contona, salah saurang katingali taat ngajalankeun ritual, tapi ritualna eta teu aya pangaruh kana kahirupan sapopena sabab sarua bae jeung anu tara ngalaksanakeun syareta. 

Sedengkeun, jalma nu geus nepi kana hakekat komo marifat, tinangtu lain ukur taat kana ngalaksanakeun rupa-rupa syareat, tapi dina kahirupan sapopoena bakal katingali dina bentuk, welas asih ka sasami, hormat jeung patuh kana pituah para sepuh, oge tara ieuh cieut kanu beureum komo deui ponteng kanu koneng.

Mugia ku ayana ieu buku nu mangrupakeun kumpulan sajak, salian bakal nambah khazanah kaelmuan kasundaan, oge tiasa nganteur ka sakumna nu maca anu seja ngaguar rahasia kahirupan para karuhun di alam kalanggeungan jeung harewos bojong anu ditepikeunanan. Cag………! 

Mangga diantos kaluaran buku anu judulna " MANTRA SAJAK"

Wassalamualaikum Wr. Wb.